North star

‘Di ko alam kung inaadya ng mga planeta.
Baka nga nasa linya ang Mars, Saturn at Jupiter
noon – nang kita’y masilayan, mamasdan.

Maningning kasi ang iyong paglitaw,
nasilaw ako nang bahagya, inaamin ko.
‘Di ko pinansin – bakit nga ba naman biglang
lilitaw ang ‘sang marikit, maamong bituin
sa dakong hapon?

Nang kita’y titigan, nakita
ko ang daigdig sa kislap
ng ‘yung mga mata.

‘Di ko pinansin – bakit nga ba naman biglang
magbibiro ang uniberso gayung matagal na
ako nitong binibigo?

Nang kita’y lisanin, nakita
ko ang kislap ng ‘yung mga mata
saan mang dako sa daigdig.

‘Di ko pinansin.
‘Di rin ako mapalagay.
‘Lang gabi ang lumipas, ang ‘yung kinang
ay nananatiling nakaguhit sa kalangitan –
nagbubura ng lungkot, naglalagay ng ngiti.

‘Di na ako nasilaw nang titigan kita.
Dahil nasilo na pala ako – ng ‘yung indak,
ng ‘yung ganda, ng ‘yung ningning.

Nang kita’y gawing musa,
naisip ko – mananatili ka bang nakasilay
sa gawing itaas ng Hilaga
gayung andito naman ako
sa gawing ibaba
nagpupuyat kasama ang masa?

Cosmic Reasons

Nagiging masalimuot ang mga pangyayari. Sadya lamang sigurong mahiwaga ang buwan ng Hulyo at Agosto. Pati pala ang Hunyo. Parang bagyo — laging walang pagbabadya, walang paalala.

May mga dahilan, nararamdaman ko. ‘Di ko lamang alam kung talagang inaadya. E kada buwan kasi, may nangyayaring mabigat — may bahaging negatibo, may bahaging positibo, meron din namang ‘di mo mawari kung ano, at meron namang nagbabadyang maging positibo pero negatibo pa ngayon pero pakiramdam ko ay hindi naman talaga negatibo bagkus ay positibo.

Ewan, pati ako naguguluhan na minsan. Paano mo ba malalaman kung ano ang susundin? Ang daming magkakahalo — palaging nagsasalimbayan, palaging nagpapaligsahan.

Baka ganoon na lang, naisip ko — ang gawing musa ang mga positibo, ialay na lang sa altar ang mga negatibo.

Magkakaroon ba ng aparisyon ng bagong musa na nilikha lahat ng mga positibo, kung gayun? O baka naman meron na,  ayaw lang iadya ng panahon/pagkakataon? Baka naman inaadya na, kaya babaguhin na ang panahon/pagkakataon?

Susubukan kong magmalimos ng sagot sa darating na mga araw. Sa ngayon, hihiga lang ako gabi-gabi sa damuhan, titingala sa kalangitan, mananalangin ng mga pag-aadya. Ngingiti na lamang pagkatapos. Maaliwalas kasing titigan ang aking North Star.